BJP-in PM piancham pualin 'Sewa Pakhwada' buatsaih dawn

Bharatiya Janata Party (BJP) chuan prime minister Narendra Modi piancham pha pualin, September 17 hian ram pumah vantlang hnena tualchhung thilsiam chawi larna leh, India mahni kea dinna tur tihhlawhtlinna turin 'Sewa Pakhwada' awareness campaign a buatsaih ṭan dawn.

Campaign hian mipui hnenah faina, mahni kea din, service leh ram siam ṭhatna lam inzirtirna pek chu a tum ber a ni. Sewa Pakhwada hian PM Modi piancham pha, September 17 aṭanga Mahatma Gandhi piancham pha, October 2 thleng a awh dawn.

Union minister Bhupender Yadav leh BJP national general secretary Sunil Bansal chuan Mahatma Gandhi leh prime minister Lal Bahadus Shastri te piancham puala buatsaih pawh a nih tel thu nimian press conference an neihah an tarlang. Hun hman chhung hian hmalakna hrang hrang - blood donation camp, health check-up camp, cleanliness drive, environmental protection campaign, exhibition, dialogue programme, rualbanlo thil mamawh sem chhuah, ‘Modi Vikas Marathon’, sports festival leh lem inziah siakte huaihawt a ni dawn bawk.

Heng bakah hian September 25, Pandit Deendayal Upadhyaya piancham phaah tualchhung thil siam chawilarna tur, ‘Aatmanirbhar Bharat, Viksit Bharat’ campaign hawn a ni ang a, hei hi December 25 prime minister hlui Atal Bihari Vajpayee piancham pha thleng awh tura tih a ni bawk.

State tinah dialogue event 771 kalpui a ni dawn a, ‘Modi Vikas Marathon’ chu September 21 aṭangin khawpui lian 75-ah neih a ni ang. Sports festival atana inziahluh hun hi August 29 aṭanga neih tawh niin, September 21 hian Sewa Pakhwada pualin hawnna hun hman in December -January chhung campaign neih chhunzawm a ni ang a; Viksit Bharat, Aatmanirbhar Bharat, leh Drug-Free India chu ṭhalaite inpawh tlanna atana ruahman a ni.