VP atan CP Radhakrishnan lak luh a ni

India Vice president 15-na turin CP Radhakrisnan chu nimin, Zirtawpni khan president Droupadi Murmu chuan Rashtrapati Bhavan, Delhi-ah rinawmna thu tiam tirin a la lut. Radhakrishnan hian thutiam hi sap ṭawngin Pathian hmingin a tiam.

September 9-a Vice President thlanah Radhakrishnan hi BJP kaihhruai NDA aiawh niin INDIA bloc candidate Justice B. Sudershan Reddy chu vote 152-in a hneh a ni.

Vice president thar Radhakrishnan hi kum 67 mi niin, lak luhna inkhawmah hian hruaitu lawk tak tak prime minister Narendra Modi, home minister Amit Shah, defence minister Rajnath Singh, BJP president JP Nadda, leh vice president hlui Hamid Ansari leh Venkaiah Naidu te'n an tel pui.

Kumina vice president thlanna hi vice president chelh lai Jagdeep Dhankhar-a'n a hun neih hmang zo loa July 21-a a ban thut vang niin, Dhankar hian a taksa lam hrisel lohna vang a nih thu a sawi chiang tawh a ni. Rhadhakrishnan lawm luhnaah hian vice president aṭanga a ban hnua mipui hmaa a inlan lehna hmasa ber turin Jagdeep Dhankhar pawh a tel.