NITI Aayog meeting-ah CM tel lo an tam
Prime Minister Narendra Modi kaihhruaiin nimin khan NITI Aayog Governing Council meeting vawi hnihna neih a ni a, mahse chief minister eng emaw zat an tel duh lo.
NITI Aayog Governing Council-ah hian state tin chief minister leh Union Territory-a governor-te an tel a, Prime Minister-in a ho.
Nimina meeting-ah hian Congress sorkarna state pakua-a chief minister-te an tel lo a, anni bakah hian West Bengal, Tamil Nadu, Uttar Pradesh leh Odisha chief minister-te pawh an tel duh lo.
NDA sorkarna state chief minister-te leh Bihar, Delhi leh Tripura chief minister-te an tel a, Right to Fair Compensation and Transparency in Land Acquisition, Rehabilitation and Resettlement Act chungchang an sawiho.
Prime Minister Modi chuan ramchhunga retheihna umbo turin sorkar laipui leh state sorkarte an thawhho a ngaih thu a sawi a, a kaihhruai sorkarin land acquisition bill siam danglam a tum pass theih loha la tang chuan thingtlang bial tana hmasawnna thawhna kawngah te, school, hospital, kawngpui leh irrigation project siam thlengin a nghawng phah a ni, a ti.
Modi chuan NDA sorkar hnuah state hrang hrangte chuan Right to Fair Compensation and Transparency in Land Acquisition, Rehabilitation and Resettlement Act, 2013 kalpui dan chungchangah zawhna tam tak an nei tiin a sawi. State tam tak chuan 2013 Act hian hmasawnan tura hnathawh a ti ṭhuanawp a, hei vang hian he Act hi thlak turin chief minister ṭhenkhatin an ngen tih a sawi.
Meeting zawha press conference-ah, Finance Minister Arun Jaitley chuan meeting-a tel, chief minister 16-te mamawh thlen hrang hrangte chu PM chuan dawhthei takin a ngaihthlak sak a ni tiin, Land Anquisition Bill pass dawn pawhin state hrang hrangte dinhmun ngaihtuah a ni ang, a ti.
Jaitley chuan, "PM chuan UPA sorkarin a lo pass tawh, Land Acquistion Act chu state tam zawkin an kalpui theih loh thute a sawi a ni," tiin, he Acts siamṭhat duh danah hian state tam takte ngaihdan pawh a inang a ni, a ti.