1993-a Mumbai-a bomb tipuaktu khaihlum dawn

Kum 1993-a Mumbai khawpuia bomb tipuaktu, Yakub Abdul Razak Memon chu July 30 zing dar 7 hian a tanna, Nagpur Central Jail-ah khaihlum a ni dawn.

Memon hian Supreme Court-ah a hremna ennawn tura dilna, petition a thehlut a, hei hi July 21-ah ngaihtuah ang a, a dilna hi hnawl a nih chuan July 30 hian khaihlum a ni ang.

Maharashtra Chief Minister Devendra Fadnavis chuan state sorkar chuan Memon tihhlum tur chungchangah, Supreme Court thupek ang chu a zawm zel tur thu a sawi.

Supreme Court hian April thla khan Memon-a'n a chungthu ngaihtuah nawn tura a ngenna chu a lo hnawlsak tawh a ni. Hemi hnu hian state sorkar chuan khaihlum a nih theihna atan hian TADA court ah phalna a dil a ni. Supreme Court hian Memon tihhlumna tur hi nikum June 2 leh September 26 khan a lo tihkhawtlai sak tawh a ni.

Nikum khan Memon hian President Pranab Mukherjee hnenah a laka zahngaihna lantir turin a lo dil tawh bawk a, mahse President hian a dilna hi hnawlin Maharashtra sorkar pawh a hriattir nghal a ni.

Kum 53 mi, Memon hi kum 2007 khan Special TADA court chuan Mumbai khawpuia vawi eng emaw zat bomb puaka a inhnamhnawih avangin thi turin a chungthu a lo relsak tawh a ni. Mumbai khawpuia ṭum 13 zet bomb puakah hian mi 257 an thih bakah, mi dang 700 chuang hliam an tuar a ni. Kum 1993 hian Bombay Stock Exchange, cinema hall, bazar hmupui leh hmun dang emaw zat bomb tihpuah a ni.

Mumbai police-te chuan bomb hi gangster Dawood Ibrahim-a thupek anga tihpuah niin an sawi a, hei hi 1992-a Hindu firfiakte'n mosque an tihchhiat avang leh, intualvuakna thlenga Muslim mi tam tak tihhlum an nih vanga phuba lakna niin an sawi. He pawikhawihna thlengah hian special anti-terrorism court chuan mi 100 thiam loh a chantir tawh a ni.