Cheng vbch 30,000 man Defence Deal tifel
Defence Minister Manohar Parrikar kaihhruai Defence Acquisition Council (DAC) chuan cheng vaibelchhe 30,000 man defence equipment leina tur a tifel.
Defence hmanrua lei thar tur zingah hian anti-aircraft gun a tel a, hei hi Indian company-te hnena aṭanga lei tum a ni. Mahse Indian firm zingah an duh ang zat ralthuam siam hi an la awm lo.
Indian Army chuan anti-aircraft gun hlui thlakin, cheng vaibelchhe 16,900 man a thar 428 a lei dawn a ni. Army-te hian kum 1950 vela siam, L-70 leh Zu-23 mm an hmang mek a, hengte hi Sweden rama ralthuam siamtu, Bofors leh Soviet Union hunlai mi Posolsky Electromechanical Plant hnen aṭanga lei an ni.
Kum 2013 khan sorkar hmasa, UPA sorkar chuan anti-aircraft gun leina tur hian global tender a tichhuak a, Israel, Britain, France, Russia leh Poland firm-te chu chhang turin a ngen bawk. Mahse firm-te hian tender tihchhuah chu a hlawk tawk lo nia ngaiin an chhang lo a, a hnuah he tender pawh hi tihtawp zui nghal a ni.
NDA sorkar chuan defence equipment te hi Indian company-te leh foreign company ṭangrualte hnen aṭangin lei theih a beisei a ni.
DAC chuan Indian Navy-te chu P8i maritime surveillance aircraft pali, cheng vaibelchhe 4,380 man a lei belh a phalsak bawk a, hengte he hi US hnen aṭanga lei an ni ang. Navy hian Boeing siam long-time maritime submarine leh anti-submarine aircraft pariat a nei mek a ni.