Hazare-a'n OROP chungchang a sawipui

Social activist Anna Hazare chuan nimin khan Defence official hluite chu a chenna, Maharashtra-a Ralegan Siddhi khuaah kawmin, One Rank, One Pension (OROP) scheme kalpui tura sorkar nawr dan tur an sawiho.

Hazare kawmtute hi Colonel Dinesh Nain (retd) leh Brigadier Kartar Singh (retd) te an ni. Hazare hian a hmain Prime Minister Narendra Modi chu lehkha thawnin, sipai bangte thil phut OROP scheme hi a rang thei ang bera kalpui turin a phut a, a kalpui duh lo a nih chuan rampum huapa nawrh huaihawt an tum thu a hrilh. Hemi rual hian a thiltih chuan politics nena inkaihhnawihna a neih loh thu a sawi nghal bawk.

BJP kaihhruai NDA sorkarin OROP scheme kalpui tumna tak tak a nei lo tiin Hazare chuan a lo sawi tawh a, sipai bangte chu an hna aṭanga an chawlh tawh hnuah pawh zah taka en zui zel a ṭul a ni, a ti.

"NDA sorkar hian inthlanpui neih dawn khan OROP hi a hmang ang tiin a lo sawi tawh a, mahse kum khat chuang a sorkar hnuah pawh engmah a la ti lo a ni. Land Acquisition Bill an buaipui viau laiin, OROP erawh chu an ngaihsak lo hle a ni," tiin Hazare chuan a sawi.

"Sipaite chuan hun hrehawm leh khirh tak tak an paltlang ṭhin. Rajasthan thlalerah emaw, Jammu and Kashmir-a vur zingah pawh ram tan theihtawpin an bei ṭhin. An chawlh hnuah pawh zah taka en zui zel an phu a ni. Ram tana an nunna thapa inpete hi zahawm taka an nun chhunzawm theihna tur siamsak an ni tur a ni," a ti.