SP hotu sawiseltu IPS officer suspend

Uttar Pradesh sorkar chuan an state-a rorellai, Samajwadi Party hotu lu ber, Mulayam Singh Yadav-a sawiseltu IPS officer chu pawngsual thubuai siamsak a nih hnuah Thawhṭanni zan khan a suspend.

IPS officer Amitabh Thakur hian SP hotu, Mulayam Singh Yadav-a'n a vau nia a sawi hnuah a lakah hmeichhe pakhatin pawngsual thubuai a thehlut nghal. Hei hi Thakur chuan SP hotu a sawisel avanga a laka phuba lak tuma an phiarrukna tiin a sawi a, suspend a nihna chu court-ah khin let a tum thu a sawi bawk.

UP Home Department chuan IG (Civil Defence) Thakur hi nungchang ṭhat loh vang te, sorkar dodal zawnga a awm vang te, High Court thupek a zawm duh loh vang te leh, a mawhphurhna hlen loa dan kalha a chet avangin hrem a ni, a ti.

Thawhṭanni khan Thakur hian Delhi-ah Home Affairs Ministry official-te hmuin, a laka pawngsual thubuai ziahluh a nih chungchang chu CBI chhui tir turin a phut a ni. Hei bakah hian a nupui, social activist Nutan Thakur pawh state minister Gayatri Prasad Prajapati thil neih dan dik lote Lokayukta-a a thlen avangin vau a ni tiin, an nupa tana central force venhimna pe turin a dil nghal bawk.

Mulayam Singh Yadav-a fapa, Uttar Pradesh Chief Miniser Akhilesh Yadav chuan a pa-in IPS officer a lo hau a ni pawhin thil dik loah a ngai hran lo tih a sawi. "Mulayam Singh Yadav chuan Chief Minister pawh a hau thei a nih chuan, official te a lo hau chu a dik lohna a awm hran lo," tiin a sawi.

UP senior minister Azam Khan pawhin Thakur-a laka pawngsual thubuai thehluh chu chhui chian thuai a phut thu sawiin, "Mawi lo takin a che a, ngaihthiam mai tur a ni lo," a ti.

IPS officer laka pawngsual thubuai thehluttu hi Gaziabad-a cheng hmeichhe pakhat a ni a, a thubuai thehluhah hian pawikhawihnaah Thakur-a nupui, Nutan Thakur pawh a inhnamhnawih niin a sawi.