Ram paruk tlawha zin PM a rawn haw

Prime Minister Narendra Modi chu ni riat thanga Russia leh Central Asia ram panga a tlawh kual hnuah Thawhṭanni zan tlai tawh takah khan Delhi a rawn thleng leh ta.

Ni riat chhungin PM hian Uzbekistan, Kazakstan, Russia, Turkmenistan, Kyrgyzstan leh Tajikistan-te a tlawh a ni. A ram tlawh hrang hrangah hian thawhdunna tur inremna thuthlung eng emaw zat an ziak nghal bawk.

Russia-a Ufa khuaa BRICS summit-ah a tel nghal a, hetah hian member ramte inpumkhat leh thawhhona ṭha zawk siam dan tur te, economic leh security lama thawhhona chungchangte an sawi. Russia-ah vek hian member paruk awmna, Shanghai Cooperation Organisation (SCO) summit a hmang nghal bawk. He summit-ah hian India leh Pakistan-te chu full membership pek remtih a ni. Summit kar lakah hian Pakistan Prime Minister Nawaz Sharif nen meeting an nei bawk a ni.

Central Asia ram panga zingah PM hian Uzbekistan a tlawh hmasa ber a, Uzbekistan President Karimov nen inkawmin, ram pahnihte inlaichinna tihnghehna tur inremna thuthlung pawimawh tak tak an ziak.

Kazakhstan President Nazarbayev leh Prime Minister Karim Massimov te a kawm bawk a, President Nazarbayev nena an inkhawm zawhah thawhdunna tur thuthlung pawimawhte ziakin, joint press statement an siam bawk.

Turkmenistan a tlawh ṭumin an ram chu International North South Transport Corridor member ni turin PM hian a sawm nghal. Mahatma Gandhi lim leh Traditional Medicine and Yoga Centre te a hawng nghal bawk.

Modi hi India Prime Minister zingah kum 20 chhunga Kyrgyzstan ram tlawh hmasa ber a ni. A hnuhnung berah Tajikistan tlawhin, kum 2003-a PM hlui Atal Behari Vajyapee hnuah PM zinga Tajikistan tlawh hmasa ber a ni.