CBI-in Setalvad-i chenna in an dap

Central Bureau of Investigation (CBI) team chuan nimin zinga khan dan kalha ram pawn lam aṭang a NGO tana ṭanpuina sum dawnga puh, activist Teesta Setalvad-i chenna in, Mumbai khawpui ami a dap.

CBI team hian Mumbai-a Setalvad-i chenna bakah, a pasal Javed Anand, Gulam Mohammed Peshiman leh Sabrang Communications and Publishing office-te an dap tel bawk.

Teesta Setalvad chuan CBI-te'n an in an dap chu mak an tih thu an sawi a, hemi rual hian an theih anga an thawhpui zel thu a sawi.

Setalvad chuan "CBI hnenah hian lehkha thawnin, min puhna chungchang an chhui chiannaah theihtawpa thawhpui zel kan tum thu kan hrilh a ni. Hetianga puh kan nihna chhan hi kan hrethiam lo a ni," a ti. Setalvad hi kum 2002-a Gujarat intualvuakna rapthlak tak thleng tuartute ṭanpui hna thawktu leh, an chanvo dik tak an hmuh theihna tura beitu langsar tak a ni ṭhin.

"He thil hi min dah beh an tumna, politics lama phuba lak tumna niin kan ngai a, min ti zak a, hrehawm taka min siam an tum a ni," tiin Setalvad chuan a sawi.

Teesta Setalvad-i din, NGO Citizens for Justice and Peace (CJP) leh a pasal director-a a awmna, Sabrang Trust -te chu phalna nei hmasa loa rampawn lam aṭanga ṭanpuina sum dawngah puh an ni. Sabrang Trust hi ram dang aṭanga cheng vaibelchhe 1 dawnga puh a ni a, CJP hi kum 2008-2014 chhung khan cheng vaibelchhe 1.18 vel dawnga puh a ni bawk.