AP-a innek buainaah mi 27 chil hlum

Andhra Pradesh East Godavari district-a Pushkaram festival hmannaah mipui pungkhawmte innek buaiin, mi 27 an chil hlum. Thi zinga a tam zawk hi hmeichhia an ni.

Festival hmanga kalte hi Godavari luia inchiah tumin lui kama Katagumman pushkar ghat gate-ah an innek buai a ni. Mi 20 chuangin hliam an tuar a, hliam tuar zingah ṭhenkhat chu an dinhmun a ṭha lo hle a, hei vang hian thi zat pawh hi an la punchhoh rin a ni.

Andhra Pradesh Chief Minsiter N Chandrababu Naidu chuan official-te hnenah chhawmdawl hna thawk turin a hriattir nghal a, mipuite chu innek buai lo a, thuneitute thu ngaichang turin a ngen bawk.

Chil hlumte ruang hi Rajahmundry government hospital-ah lak an ni.