Pahalgam beihna tuartuin IND-PAK Asia Cup a dem

Jammu and Kashmir-a kumin April 22-a Pahalgam beihna thleng vanga hmeithai ta, Aishanya Dwivedi chuan Asia Cup 2025-a India leh Pakistan match chu boycott turin a ngen. India leh Pakistan intum tur Board of Control for Cricket in India (BCCI) in rem an lo ti chu a dem thu a sawi a, Pahalgam beihna vanga mi 26 thihna chu an ngai pawimawh lo a ni, a ti.

India leh Pakistan hian Asia Cup 2025 match hi nimin Pathianni khan Dubai-ah an khel a ni. Aishanya chuan firfiak pawl thlawptu Pakistan leh India cricket match huaihawtna pawmtu BCCI chu a dem thu sawiin, firfiak pawl beihna thleng vang khan ram hmangaihna lantirna atan inkhelh hi kalpui lo ngam tur an ni, a ti bawk.

Aishanya chuan Asia Cup khelh tur chu fan lam pawhin ram pum huapa boycott a, cricket match chu TV kaltlang pawha en lo ngam turin inkhelh hma hian a ngen bawk a ni. Hetih laiin eptu party AIMIM leh Shive Sena (UBT) pawhin BJP leh BCCI chu he inkhel buatsaih a nih vang hian an dem thu an sawi chhuak. Shiv Sena (UBT) hruaitu Aaditya Thackeray chuan "Thisen leh cricket chu a lo luang za thei a nih hi" tiin a sawisel zui bawk a ni.

Maharashtra Congress pawhin Zirtawpni liam ta khan Dubai-a Asia Cup khelh tur chungchang chu Pahalgam beihna thleng ngaihnepna a nih thu an sawi a, beihna tuartu leh sipai nunna hlante zah lohna a nih thu an sawi. Sharad Pawar kaihhruai NCP(SP) pawhin sorkar chuan match khelh a phal vang hian a nihna dik tak a rawn lantir a ni, a ti ve bawk.