Vyapam scam: Member 40 awmna CBI team-in a chhui ṭan

Madhya Pradesh Vyavsayik Pareeksha Mandal (Vyapam) in dik lo taka professional course zir tur leh sorkar hna thawk tur a lakna leh, he thila inhnamhnawih mi 40 chuang thihna thleng chungchang chu member 40 awmna Central Bureau of Investigation (CBI) chuan nimin aṭang khan a chhui ṭan.

Ni 10 kalta chhung khan Vyapam scam nena inkaihhnawih mi 10-te chu mak takin an thi a, an zingah hian hemi chungchang report tu, TV Today group journalist Akshay Singh leh thil thlen dan chhuitu, Jabalpur Medical College dean Arun Sharma-te pawh an tel.

Supreme Court-in Vyapam scam chhui tura a hriattir hnuah, CBI team chuan nimin khan Bhopal an pan nghal a ni. A hmaa lo chhui tawh tu, Madhya Pradesh sorkarin a din, Special Investigation Team (SIT) leh Special Task Force (STF) te chuan an thil chhuina atana document an lo lak khawm tawh, ton 10 zet chu CBI hnenah hian an hlan nghal ang.

Chief Justice of India HL Dattu kaihhruai bench chuan July 9-a Vyapam scam chhui hna CBI kuta a hlan hnu khan, July 24-ah report thehlut turin a ngen nghal a ni.

Vyapam scam kaihhnawihah hian mi 2,100 chuang man an ni tawh a, inhnamhnawiha puh zinga mi 491 chu chin hriat lohin an bibo mek bawk.

CBI team hi Bhanwari Devi thubuai chhuitu, Meghalaya cadre officer, RP Agrawal-a'n a ho.

Congress hruaitu PC Chacko chuan CBI-in Vyapam scam a chhui tur chu lawmawm a tih thu a sawi a, dik lo taka thiltihnaa inhnamhnawihte chu haichhuak vek tura an duh thu a sawi.

Vyapam scam-ah hian Madhya Pradesh Governor Ram Naresh Yadav-a chu inhnamhnawiha puh zinga No. 10-ah a tel. Hei vang hian bang tura nawr a ni a, mahse a bang duh lo a ni. Thil dik lo tihnaaah hian inhnamhnawiha puh ni mah se, a office a luah chhung chuan thubuai siamsak theih a ni lo tia Madhya Pradesh High Court-in a tih avangin tun thlengin chhui a la ni ve lo. Mahse CBI-in thubuai hi a chhui dawn avangin Governor pawh hian chhui a pumpelh thei tawh dawn bik lo nia sawi a ni.

Madhya Pradesh-a Left party pali- Communist party of India, Communist Party of India (Marxist), Socialist unity centre of India (communist) leh Communist party of India (ML liberation) chuan Vyapam scam an duh lohna lantirin July 16 hian state pumah nawrh huaihawt an tum. Left party-te chuan Chief Minister Shivaj Singh Chouhan chu bang turin an phut bawk. July 16 hian Congress party pawhin lungawi lohna lantir an tum bawk.