IPS officer-in SP hruaitu vauna chhui chian a phut

Samajwadi Party (SP) hotu lu, Mulayam Singh Yadav-a'n a vau nia sawitu, Uttar Pradesh-a IPS officer Amitabh Thakur chuan nimin khan a chunga thil thleng chu Central Bureau of Investigation (CBI) chhuitir a phut thu a sawi.

IPS officer hian SP hruaituin a vau dan chu Home Ministry-ah thlen a tum thu a sawi bawk. "Mulayam Singh hian min vau turin dikna emaw, thuneihna emaw a nei lo. Hei vang hian Delhi-ah kalin Home Ministry hnenah ka thlen dawn a ni," a ti.

Thakur hian SP hotuin a vau nia sawiin police-ah complain a thehlut a, a vauna nia sawi, audio record pawh a tichhuak a ni. Mahse audia record tihchhuah tukah police offier hi pawngsuala puhna thubuai Lucknow-a Gomti Nagar police station-ah ziahluh a ni ve leh nghal. Thakur chuan hei hi thu dik lo, SP-te'n an beih letna a nih thu a sawi thung.

SP chuan Thakur-a audio record tihchhuah chu siamchawp a nih thu sawiin, Mulayam chuan tumah a vau ngai lo, tiin party thupuangtu CP Rai chuan a sawi. Rai chuan, "Mulayam Singh Yadav hi hruaitu senior tak niin midang vau zawnga a chet kan hre ngai lo.Thakur pawh hian Mulayam hi a hrechiang hle ang. Hetianga an inbiakna ni anga siam a, mipuite hriata a vawrhdarh hi thil tihawm lo tak a ni," a ti.

Hetihlai hian Thakur chuan Uttar Pradesh-a SP sorkar chu eirua a puh avangin Mulayam Singh hian a vau niin a sawi. Hei bakah hian a nupui, social activist Nutan Thakur pawhin state minister Gayatri Prasad Prajapati thil neih dan dik lote Lokayukta-a a thlen avangin vauna a tawk bawk a ni, a ti.