India leh US insumdawn tawnna tur sawi hona nei leh

US president Donald Trump-a'n India laka chhiah lak tur 50% a a tihsan hnuah India chief negotiator, Department of Commerce-a special secretary Rajesh Agarwal leh US aiawh Brandan Lynch, Assistant US Trade Representative for South and Central Asia chuan inbiakna nei leh.

Inbiakna nei tur hian Lynch chuan Thawhṭanni khan India a rawn thleng a, chhiah tihsan vanga bungraw thawn chhuaha harsatna an tawh tihziaawmna turin US chuan sumdawnna tura inbiakna neih hi an rawt niin official-te chuan nimin khan an tarlang. Sorkar chuan ram chhunga loneitute, bawnghnute lam thartute leh Micro, Small, and Medium Enterprise duhdan an ngaih pawimawh zel tur thu an sawi nawn leh a ni.

Tun ṭum hi US-in India chhiah a tihsan hnua US trade official-in India an rawn tlawhna hmasa ber a ni. India leh US hi ṭum nga an inbe tawh a, mah se inremna an la siam thei lo. Official lam chuan nimina inbiakna neih hi ram pahnih official-a inbiakna neih leh tura an tih vawi rukna anga ngaih a ni dawn lo tih an sawi.

Official chuan India leh US hi virtual hmangin kar khat danah inbiakna an neih reng thu an tarlang a, hei hi president Trump-a'n India nena sumdawn tawnna ṭha lam neih beisei zawnga sawi a neih hnuah neih a ni. India chuan Russia aṭanga crude oil a lei chungchangah a dinhmun ala sawhsawn lo a, oil lei chu ram mamawh dan leh leina in a nghawng ang zela kalpui a nih thu a tarlang.