Vyapam scam: Mi 2,000 man an ni tawh

Madhya Pradesh Professional Examination Board (MPPEB)-in medical college zawm tumte tana entrance exam a buatsaih leh sorkar hna thawk tur a laknaa dik lo taka a kalpui dan, kum 2013-a haichhuah chuan buaipui a hlawh chhunzawm zel. He thil thleng kaihnawihah hian mi 2,000 chuang man an ni tawh.

Entrance exam beitu zirlai-te chuan thamna sum tam tak an pe a, heng thamna dawngtu zingah hian politician, sorkar officer leh official dang ṭhahnem tham tak an inhnamhnawih nia puh a ni.

Congress party chuan candi­date nuai 77 zetin thamna sum an pe tiin a sawi.

MPPEB in dik lo taka thil a kalpuina, Vyapam scam chhui hna hi kum 2013, August thla aṭang khan Madhya Pradesh police hnuaia Special Task Force te'n an thawk a ni. He thil thleng kaihhnawihah hian FIR 56 ziah luh a ni tawh bawk.

He thil thlengah hian inhnam­hnawiha puh, mi 2,500 zingah 2,000 chuang man an ni tawh a, midang eng emaw zat chu chin hriat lohin an bibo a ni.

Vyapam scam kaihhnawiha man zingah hian zirlai leh, sorkar hna diltu mi 900 vel an tel a, candidate nu leh pa 450 an tel bawk.

Dik lo taka thiltihnaa inhnam­hnawih leh thuhretua koh zingah mi 48 chu kum nga chhungin an thi tawh a, an zinga eng emaw zat chu mak takin an thi a, hei hian sawi zui a hlawh phah hle.

Eptu party hrang hrangte chuan Vyapam scam leh hemi kaihhnawiha thihna thleng fo chu CBI chhuitir an phut. Madhya Pradesh Chief Minister Shivraj Singh Chouhan chuan CBI chhuitir an phutna hi hun rei tak a pawm duh loh hnuah, he thila inhnamhnawiha puhte an thih belh zel leh, eptu lamte nawrna a nasat tawh avangin a remti dawn ta nia sawi a ni. Madhya Pradesh sorkar chuan Madhya Pradesh High Court hnenah Vyapam scam hi CBI chhuitir tura ngenna a thehlut tawh a, Jabalpur bench chuan nimin khan he ngenna hi a ngaihtuah nghal a ni.

Madhya Pradesh Governor Ram Naresh Yadav leh a fapa chu medical college-a luh duh zirlaite hnen aṭanga thamna dawng zingah puh an ni bawk a, mahse Governor hna chelh lai a nih avangin chhui theih a nih rih loh thu Madhya Pradesh High Court chuan a lo sawi tawh. Kumin March thla khan Governor fapa, Shailesh Yadv chu police-te'n thu an zawhfiah hmain Lucknow-a a chenna inah thia hmuh a ni.

Vyapam scam chungchang report-tu, TV journalist Akshay Singh pawh mak takin a thi a, a thih dan hi CBI chhuitir ngei an phut thu Editors Guild of India chuan a tarlang bawk.