Rajasthan Governor-in hnam hla siamṭhat a duh

Rajasthan Governor Kalyan Singh chuan India hnam hla, national anthem-a 'adhinayaka' (ruler) tih awm chu tihbo a duh thu a sawi.

Governor Kalyan Singh chuan national an­them-a 'adhinayaka' chu India rama British ro­rel­tute fakna a ni tiin, he ṭawng­kam hi tibo a, a aiah 'mangal' (good wishes) tih hman zawk a rawt.

University of Rajas­than convocation cere­mo­ny-ah thu a sawiah Singh chuan hnam hla siamṭhat a duh thu hi a sawichhuak. Singh chuan, "Rabindranath Tagore chu ka zah em em a, mahse 'adhinayaka' tih ṭawngkam hi chu thlak a ngai a ni," a ti.

Rajasthan Governor thusawi hi nimin khan Tripura Governor, Tatha­gata Roy chuan social media kaltlangin a chhang let ve nghal a, national anthem chu siam ṭhat ngai a tih loh thu a sawi. Roy chuan, "Zalenna kan hmuh aṭangin kum 67 a ni tawh. Kan Adhinayaka chu British mite nih tir kher kan tum em ni? Hnam hla lo siam danglam hi a dikin ka hre lo," tiin a twitter-ah a tarlang.

Tathagata Roy hi BJP hruaitu hlun niin, national anthem phuahtu Rabin­dranath Tagore-a chenna, West Bengal state mi a ni.

Tagore-an a phuah hnu lawk, kum 1911 pawh khan national anthem-a 'adhinayaka' tih hian inhnialna nasa tak a lo chawk chhuak tawh a ni. Hun rei tak ngawihsan a nih hnuah, kum 1937 khan Tagore chuan Pulin Behari Sen hnena a lehkha thawnah, British roreltute a fakna a nih loh thu a hrilh.