Teesta-i lakah thubuai ziak lut

Central Bureau of Inves­tigation (CBI) chuan civil rights activist, Teesta Setalvad-i chu a pawl enkawlin sorkar laka phalna la hmasa loa rampawn lam aṭanga sum a dawn chung­changah thubuai a siam sak.

CBI-in FIR a thehluhah hian Teesta-i pasal Javed Anand, sumdawng Gulam Mo­ham­med Peshimam leh Sabrang Communications and Publishing te pawh ziah lan an ni bawk.

CBI chuan document pawimawhte a enfiah mek a, Teesta-i te nupa bakah Citizens for Justice and Peace dintu, Peshimam-te hi thu zawhfiah tura koh thuai rin an ni. An thubuaiah hian thiam loh chan tir an nih chuan kum nga thleng lung-in tantir theih an ni ang.

Sorkar laipui chuan CBI hnenah hian US-a Ford Foun­dation-in Sabrang Commu­nication and Publishing Pvt Limited (SCPPL) hnena sum a pek dan hi chhuichiang turin a lo hriattir tawh a, June 26 khan firm bank account hi khawih chet theih lohin a lo hreksak tawh bawk.

SCPPL hian Home Minis­try phalna la hmasa loin, Ford Foundation aṭang hian donation-ah dollar nuai 2.9 a dawn avangin Foreign Contri­butions Regulation Act (FCRA) palzuta puh a ni. Pawl leh private firm-te hian FCRA hnuaia an inziahluh hnuah chauh rampawn lam aṭangin donation an dawng thei a ni.

Gujarat sorkar chuan Home Ministry hnenah US-a Ford Foundation chu ramchhung inrelbawlnaa inrawlh leh, Tees­ta-i enkawl NGO kaltlanga inhuatna thlen thei zawnga boruak siamah puhin, a laka action la tur hian a lo phut tawh bawk.