Maoists-in ralthuam hman titawp rih dawn, sorkar inkahhai puang turin ti

Maoist helpawl chuan tun hnaia thuchhuah an siamah ralthuam cheleka buaina an siam ṭhin titawp a, sorkar nena inbiak an duhthu an tarlang. Ralmuang taka inbiak a nih theih nan sorkar chu thla khat chhung inkahhai puang turin leh an laka beihpui thlak titawp turin an ngen. Chhattisgarh sorkar chuan thuchhuah siamte hi a tak ngei a ni tih an finfiah tawh niin an sawi.

Maoist thuchhuah siamah hian an thupuangtu Abhay thlalak, email, leh Facebook ID an dah lang tel a,August 15 a ziah daih tawh kha a ni. Helpawl hian tun hnaiah inbiakna muanawm neih chu chhan hrang hrang vangin an ngiat tawh a, hengte hi an hruaitu lute beihpui thlaknaa an thih vang pakhat niin sawi a ni.

Thuchhuahah hian inbiakna neihah jail-a tang mek an party hotute chu tel phalsak an duh thu pawh an tarlang. Police-ten an nawr leh an beih chhunzawm zel chuan inbiakna neih tur hi a tibahlah thei dawn niin an sawi bawk. An hruai tang mekte chhuah a, an pawl mi leh sate himna ngaihtuahsak an nih chuan inbiakna ṭha tak an nei thei dawntih an sawi. Ngenna an siam chungchangah sorkar chu a thutlukna hriattir turin an ngen nghal bawk.

Bastar Range inspector general of police Sundaraj P chuan thuchhuah siam chu finfiah mek a nih thu leh an thil ngente chu uluk taka zirchian a nih thu a sawi a, Maoists nena inbiakna chu sorkar kuta awm a nih thu leh mumal taka neih a nih tur thu a sawi.