Russia-ah PM Modi leh Pakistan PM inhmu dawn

Prime Minister Naren­dra Modi chuan vawiin hian Russia-ah BRICS summit a hmang dawn a, hemi rual hian Pakistan Prime Minister Nawaz Sharif nen meeting an nei bawk ang.

Ram pahnih prime minister-te hian nikum May thla hnua official meeting an neih lehna hmasa ber tur a ni. He hunah hian India leh Pakistan inlaichinna hrang hrangte an thlir nawn dawn a ni.

Pakistan Foreign Of­fice thupuangtu, Qazi Kha­­lilullah chuan hruaitu pahnihte meeting neih tur hi a pawimawh hle tih sawiin, "India-in BRICS sum­mit hrula meeting neih a rawtna chu lawm takin kan lo pawm a ni," a ti. Sha­rif chuan Pakistan ram ṭhen­awmte chu inlaichinna ṭha tak neihpui vek a duh a ni tiin Khalillulah chuan a sawi.

Modi leh Sharif-te hi nikum November thla khan Kathmandu-ah SAARC Summit neihna hmunah an inhmu a, mahse official meeting erawh an nei lo.

BRICS summit vawi sarihna hi niminaṭang khan Russia-a Ufa khuaah ṭan a ni. Tun ṭum summit-ah hian BRIC New Development Bank hawn dan te, Contingent Re­serve Arrangement hnuaia currency pool siam te, direct transac­tion chung­chang te, foun­ding member te'n opening capi­tal dollar tlukleh­dingawn 50 an insem dan tur te, member ram sum lama ṭanpui ngaite inpuih tawn dan tur te an ngaihtuah tel dawn a ni. Leiba ngah avang talbuai mek, Greece ram chungchang pawh an ngaihtuah tel bawk ang.

BRICS hi G-20 mem­ber ram panga- Bra­zil, Rus­sia, India, China leh South Africa-te'n kum 2010 a an din a ni a, a hruaitu hna hi member ramte hian inchelh chhawk­­in, kumtinin sum­mit buatsaih ṭhin a ni. BRICS rama cheng hi mi tluk­lehdingawn 3 dawn an tling a, hei hi khawvel puma mihring awm zat aṭanga 40% a tling.