Vyapam scam: Supreme court-in CBI a chhuitir dawn

Madhya Pradesh Pro­fessional Examination Board (MPPEB) in exa­mi­­nation a buatsaih hmanga dik lo taka pro­fes­sion course zir tur leh sorkar hna thawk tur a thlan chung­chang, Vyapam scam chu chhui turin Supreme Court chuan Central Bu­reau of Investigation (CBI) a hriattir.

Vyapam scam-a inhnam­­hnawiha puh leh thuhretu mi 40 chuang chu mak takin an thi a, hei vang hian Supreme Court-ah CBI chhuitir tura ngenna eng emaw zat thehluh a ni. Petition thehluttu zingah hian Congress hruaitu Digvijay Singh pawh a tel. Nimin khan SC chuan hei hi ngaihtuahin, CBI chhuitir a remti ta a ni.

Dik lo taka thil tih­naa inhnamhnawih hi haichhuah belh zel an ni a, Minister, judge leh sorkar officer lian fate pawh college seat lei zingah an tel nia sawi a ni leh tawh.

He thila inhnam­hnawih­a puh ṭhenkhatte chuan sum hmanga college seat lei zingah sorkar mi pawi­mawh fate an tel tih lanna document hi Supreme Court-ah pek an tum. College seat lei zingah hian IAS, IPS leh judge fate leh an chhungte pawh an tel niin an sawi. Hei bakah hian he thila inhnam­hnawiha puh zinga mi, Madhya Pradesh Go­vernor Ram Naresh Yadav-a bang tura phutna pawh SC-ah thehluh a ni bawk.

Vyapam scam hian sorkar institution chauh a huam lo nia sawi a ni a, private medical leh dental college-ah sum eng emaw zat hmangin minister, judge leh sorkar officer chhungte hnenah seat pek a ni bawk tiin an sawi.

Kum 2012-a dik lo taka thiltih hailan a nih aṭang khan mi 2,000 vel man an ni tawh a, an zingah hian state minister hlui, sorkar officer eng emaw zat leh zirlai tam tak an tel.

Chief Justice HL Dattu kaihhruai bench chuan Vyapam scam hi CBI-in a chhui dawn tak avangin, kar leh Thawhṭanni aṭangin hemi kaihhnawihah thubuai awm zawng zawngte chu CBI kutah hlan a ni ang a, an ni hian July 24-ah report an thehlut ang, tiin a sawi. Vyapam scam hi a Madhya Pradesh sorkarin a ruat, Special Investigation Team (SIT) leh Special Task Force (STF) te'n an chhui mek a ni.

Madhya Pradesh Chief Minister Shivraj Singh Chouhan-a'n CBI chhuitir a duh loh avanga eptute'n an nawrna chu SC thutlukna siam vang hian a reh phah rin a ni a, mahse Parliament lamah Prime Minister Narendra Modi nawrna a nasa dawn thung a ni. Sorkar laipuia minister-te leh BJP hruaitute'n dan bawhchhetu, ILP hotu hlui Lalit Modi an ṭanpui chungchangah tun thlengin PM hi a la ṭawngchhuak duh lo a, hei vang hian Parliament Monsoon session neih hunah Lalit Modi leh Vyapam scam chungchangah eptute'n PM an nawr nat hle rin a ni.