Food Regulator-in industry lam a tichi-ai: Union Minister

Union Food Processing Minister Harsimrat Kaur Badal chuan tun hnaia food regulator, Food Safety and Standards Authority of India (FSSAI)-in zawrh tura pekchhuah tawh, Maggi noodles a lakkir tir leh chuan food industry lam a tichiai a, hlauhthawnna a thlen phah a ni, a ti.

Nimina New Delhi-a industry body conference-ah he thu hi sawiin, Minister Badal-i chuan tun hnaia FSSAI hi Maggi hralh a khap chungchang a sawichhuak.

FSSAI hian thla hmasa khan Nestle India chu Maggi noodle a siam sample ṭhenkhat test a nih hnuah, lead leh mono­sodium glumamate (MSG) a telhte chu mihring tana him chin tura telh phal zat a pel tih sawiin, hralhchhuah a khap a ni. Company chuan an puhna hi hnawl mah se, Maggi noodles hi a lakir a ni. Bombay High Court-ah Maggi hralh chhuah khapna hi a khing let bawk.

Maggi khap a nih hnu hian FSSAI chuan company dang ei tur siam, noodles, pasta leh macaroni-te pawh dan an zawm leh zawm loh enfiah tura test vek turin a ti leh a ni.

Ramchhunga maggi hralhchhuah khap a nih lai hian, ramdang eng emaw zat chuan Maggi noodles hi an test hnuah a him tawk tiin an sawi thung a, India ram aṭanga Maggi lakluh pawh an remti chhunzawm zel.

Maharashtra sorkar chuan Ni­laini khan state Food and Drug Admi­nis­tration (FDA) hnenah an state chhunga snack leh sweet siamtu lar tak, Nagpur-a Haldiram's thil siamte chu test turin a hriattir. Minister of state Vidhya Thakur chuan United States FDA chuan Haldiram thilsiamah hian pesticide (rannung thahna hlo), hmuar leh bacteria salmonella hmuh a nih avangin a khap tawh tih a sawi. Mahse Haldiram's chuan an thil siam chu 100% in a him a ni tiin a sawi thung.