Khawvela public works program lian ber MGNREGA

Sorkar laipuiin thing­tlang mite inhlawhfakna tura program a siam, MGNREGA (Mahatma Gandhi National Rural Employment Gurantee Act) chu khawvela public works program lian ber a nih thu World Bank chuan a sawi.

World Bank Group report, 'The State of Social Safety Nets 2015' ah hemi chungchang hi tarlan a ni a, MGNREGA chhawrtu hi maktaduai 182 vel, India ram mipui zinga 15% vel an tling tiin a tarlang bawk.

Report chuan khawvela social safety net program lian panga-te chu middle-income ramah vek an awm tih sawiin, heng ramte hi China, India, South Africa leh Ethiopia-te an ni. Heng ram panga-ah hian public works program hi mi maktaduai 526 velin an chhawr a ni.

Ministry of Rural De­ve­lopment hnuaiah, MG­NREGA hmang hian mi maktaduai 182 vel chu inhlawhna siamsak an ni. Ministry of Human Resource Development hnuaia mid-day meal scheme chu mi maktaduai 105 vel tan kalpui mek a ni bawk a, he scheme hi school feeding program lian ber a ni bawk. National Rural Health Mission hnuaia Janani Suraksha Yojna chu mi maktaduai 78 velin chhawrin, cash-transfer hmanga social security program lian ber a ni a, Ministry of Rural Development hnuaia In­dira Gandhi National Old Age Pension Scheme (IGNOAPS)-in a dawt.

MGNREGA hi sorkar hmasa, Congress kaihhruai UPA sorkar flagship prog­ram a ni a, kum 2006 Feb­ruary thla khan district 200-ah kalpui ṭan a ni. Kum 2008, April 1 khan rampum huapin kalpui a ni. Kum 2014-a BJP kaihhruai NDA a sorkar hnuah pawh program hi chhunzawm zel a ni. He scheme hnuaiah hian sorkar laipui chuan thingtlang mite tan inhlawhna, kum khatah ni 100 a siamsak ṭhin. NDA sorkar chuan khawkheng tuartu biala chengte tan hnathawh theih zat hi ni 150-a tihpun sak a tum a ni.