PM Modi-a'n Pakistan PM sawmna a pawm
Prime Minister Narendra Modi chuan Pakistan Prime Minister Nawaz Sharif-a'n nakkuma an rama South Asian Association for Regional Cooperation (SAARC) meeting neih huna zin tura a sawmna chu a pawm.
Hruaitu pahnihte hi Ufa, Russia-a BRICS summit chhimin an kal a, summit neih karah meeting an nei a ni. Hei hi kum 2014, May thla hnua official-a meeting an neih lehna hmasa ber a ni.
Meeting zawh hnu hian joint press conference neih a ni a, hetah hian India leh Pakistan foreign secretary-te'n thuchhuah inṭawm an siam a ni. Pakistan foreign secretary Azizaz Ahmad Chaudhry chuan PM pahnihte chuan darkar khat zet meeting an neih chhungin inpawh tawn takin thil tam tak an sawidun a ni, a ti. India Foreign Secretary S Jaishankar pawhin ram pahnihte hian firfiaka chetna do let dan chungchangah security adviser-te meeting neihtir an remtih thu a sawi. Hei bakah ramri buaina chungchang chinfel dan kawng ngaihtuaha DG, BSF leh DG, Pakistan ranger te meeting huaihawt thuai an remti bawk tiin Jaishankar chuan a sawi.
PM pahnihte chuan sangha mantu an inmansakte chu ni 15 chhunga chhuah zalen ve ve an remtih bakah, Pakistan firfiak pawlte'n Mumbai khawpui an beih chungchang chhuinaah thawhdun zel a, sample pawh a ṭul anga inpek tawn zel an remti bawk tiin foreign secretary-te thuchhuah chuan a tarlang.
Union Home Minister Rajnath Singh chuan Russia rama India leh Pakistan ram hruaitu lu pahnihte'n meeting nei a, foreign secretary-te'n thuchhuah inṭawm an siam thei chu lawmawm a tih thu sawiin, hei hian beiseina sang tak a siamsak tih a sawi. Singh chuan hruaitu nih tling taka PM Modi-a'n Pakistan a dawr thei chu a lawmpui thu a sawi bawk.
US pawhin India leh Pakistan PM-te'n meeting an nei chu lawmawm a tih thu a sawi a, US Secretary of State John Kerry chuan ram pahnihte'n boruak ṭha lo awmte tihreh a, thawhdunna ṭha tak an neih chhunzawm zel a duh thu a sawi.