Rajasthan sorkarin CM hlui university din a kharsak dawn

Rajasthan Chief Minister, Vasundhara Raje-i kaihhruai sorkar chuan Chief Minister hlui Ashok Gehlot-a pet pro­ject, Haridev Joshi University of Journalism and Mass Com­munication chu kharsak a tum.

State sorkar chuan uni­versity hnenah hian thla khat liamtaah khan admission lak pawh titawp turin a lo hriattir tawh a ni.

State Higher Education Mi­nister Kalicharan Saraf chuan, "He university hi kan mamawh loh avangin khar kan tum a ni. Rajasthan University-ah journalism department a awm a, staff leh zirlai pawh an nei ṭha. Hei vang hian zirna ngai bawk pekna tur hian university dang neih a ṭul lo a, sum khawralna mai a ni. He university ah hian zirlai 40 vel chauh an awm a, a enkawlna atan cheng vaibelchhe tel senral a ngai a ni," a ti.

Minister chuan Gehlot-a kaihhruai sorkar hmasa khan mi tlemte tihtlawmna leh, assembly inthlan neih tura vote zawnna atan university hi a din a ni, tiin a sawi. University dinin a kaihhnawih tur hrang hrangte ngaihtuah si loa an din ringawt chu thil ṭha lo tak nia a ngaih thu a sawi bawk.

Haridev Joshi University of Journalism and Mass Com­munication hi kum 2012, Au­gust thlaa state assembly-in bill a pass hnuah din a ni. Batch hmasa ber zirlai 40-te chuan kumin December thla khan print and electronic media course an zir zo dawn a, a batch dawt erawh chuan a la zir chhunzawm a ngai a ni. Nikum khan university hian public relations and adver­tising course a siam belh a ni.

Zirtirtu pakua awmin an zinga pathum chu a nghet a ni a, a dang paruk-te chu pro­bation niin thla thum chhunga tihngheh beisei an ni.