Panel-in MP hlawh pun rawtna a ennawn dawn

Parliamentary panel-in MP-te hlawh siamṭha a, 100% a tihsan a rawtna chu sawiseltu an tam avangin a ennawn leh dawn.

Joint Committee on Salaries and Allowances of Members of Parliament hruaitu, BJP MP Yogi Adityanath chuan panel hian report an la thehlut lo a, ennawn lehin vawiin lamah thutlukna siam hman an tum tih a sawi.

Panel hian MP-te thla hlawh 100 % a tihsan a rawt bakah, constituency allowance leh office allowance tih san te, MP pension 75% a tihsan te a rawt tel bawk.

Mahse hlawh tihpun a rawtna hi political party hrang hrang chuan an sawisel a, panel hnenah hian a rawtna hi ennawn a,ṭhenkhat chu siamṭha turin an phut a ni.

Panel member zinga mi, JD(U) MP KC Tyagi chuan, "MP te hlawh chungchangah thutlukna siam mai hun a ni lo. Mipuite'n MP-te chu hlawh sang ringawt duh anga ngaiin ngaihdan dik lo tak an siam phah thei a ni," a ti. MP-te hlawh leh hamṭhatna dang an dawnte siamṭhat chu amah pawhin ṭha a ti a, hemi rual hian hlawhbi siamṭhat chungchang chu MP-te tel lohna independent body-in ngaihtuah se a duh thu a sawi.

MP zingah pawh BJP leh Congress member ṭhenkhat chuan hlawh tihsan rawtna hi an hnial a, heng mite ngaihdan te hi ngaihtuah tel ni se, tiin Tyagi chuan a rawt bawk.

Congress hruaitu Ahmed Patel chuan loneitu leh sipaite'n an thawh hlawh pawh an lak mumal theih loh lai leh sipai bangte thil phut 'one rank, one pension' policy pawh tihhlawhtlin theih loha a la awm laia MP-te hlawh lo tihsan tum chu hun lo a tih thu a sawi.