Lakhvi-a'n voice sample a pe duh lo

26/11-a Pakistan firfiakte'n Mumbai khawpui an beihnaa a mawhphurtu bera puh, Lashkar-e-Toiba (LeT) commander Zaki-ur-Rehman Lakhvi chuan voice sample a pe duh lo.

Lakhvi-a ukil Rizwan Abbasi chuan he thu hi sawiin, "Ka client hian a hma pawhin voice sample hi a pe duh lo a, pek pawh a tum lo. Kan danah chuan voice sample pe tur hian an puha te hian an remtih a ngai a ni," a ti.

Kum 2008-a Mumbai beihna ruahmantu ber nia puh hi April 10 khan a tanna, Adaila Jail aṭangin bail-a chhuah tir a ni. Lakhvi hian a hma pawhin court-a inlan tura kohna vawi tam tak hnialin, a kal duh lo a, court-a inlan chu a nunna atana a hlauhthawnawm nia a sawi avangin Pakistan anti-terrorism court chuan amah kher inlan loh hi a lo phalsak tawh bawk.

Islamabad High Court chuan April thla khan trial court hnenah thla hnih chhunga Mumbai beihnaa inhnamhnawiha puhna thubuai a neih chu chingfel turin a lo hriattir tawh a, mahse tun thlengin he thubuai hi chinfel a la ni lo.

Kum 2009 khan Mumbai khawpui beihnaa inhnamhnawiha puhin Lakhvi bakah midang paruk- Abdul Wajid, Mazhar Iqbal, Hamad Amin Sadiq, Shahid Jameel Riaz, Jamil Ahmed leh Younis Anjum-te chu thubuai siamsak a ni. Pakistan firfiakte'n 26/11 a Mumbai khawpui an beihnaah hian mi 166 an thi a, mi dang tam takin hliam an tuar.