SC-in J&K sorkar hnenah hriattirna pe

Supreme Court chuan Jammu and Kashmir sorkar hnenah Public Safety Act (PSA) hnuaia chief minister hlui Omar Abdullah pawn chhuak thei loa hren a nih chungchang sawifiah turin hriattirna a pe. 

Omar Abdullah hi nikum August 5-a sorkar laipuiin J&K special status pekna, Article 370 a tihtawp hnu khan pawn chhuak thei loin hren zui a ni. House arrest-a hren a nih hun hi a tawp hnuah pawh February 5 khan PSA hnuaiah hren chhunzawm leh a ni. PSA hnuaiah hian thubuai siamsak kher loin thla thum chhung mi hren theiha ni a, sorkarin a ṭul a tih chuan pawhsei theih a la ni bawk. He dan hi a tlangpuiin firfiakte lakah hman a ni ṭhin. He dan hnuaiah vek hian CM hlui dang pahnih, Omar Abdullah pa, Farooq Abdullah leh Mehbooba Mufti te pawh hren an la ni.

Abdullah farnu, Sarah Abdullah Pilot chuan PSA hnuaia a nuṭapa hren a ni chu dan kalh a ni tiin, Supreme Court-ah a khing let a ni. A nuṭapa hren a nih dan chu a constitutional rights palzut sakna lian tak leh, thuneituten politics lama an khingpuite nekbeh an tumna a ni, a ti. 

Nimin khan justice Arun Mishra leh Indira Banerjee awmna bench chuan Sarah peti­tion thehluh an ngaihtuah a, J&K sorkar chu sawifiah tura hriattirna March 2-a ngaihtuah chhunzawm turin an dah.