EAM leh US secretary of State Rubio inhmu

External affairs minister(EAM) S Jaishankar leh US secretary of state Marco Rubio chu nimin khan New York -ah ram pahnih thawh dunna chungchang sawiin an inkawm.

Inbiakna hi UN General Assembly (UNGA) vawi 80-na neih tur khuhhawn hmain an nei. Ram pahnih hruaitute hi US president Donald Trump-a'n India laka chhiah a tihsan hnua hmaichhana an inbiak lehna hmasa ber a ni bawk.

Jaishankar leh Rubio bakah hian India aiawh, union commerce and industries minister Piyush Goyal kaihhruai leh US aiawhte chu nimin vek khan an inhmu bawk. Ram pahnih aiawhte hi hlawkpui ve ve theih tura insumdawn tawnna inremna, bilateral trade agreement(BTA) chungchangah inbiakna an nei ve thung. BTA hi a rang thei anga tihfel theih tum a nih thu Ministry of Commerce and Industry thuchhuah chuan a tarlang.

Ministry chuan US aiawhten September 16-a India an rawn tlawh khan, insumdawn tawnna kalpui a nih theihna tura awmze nei zawka inbiakna neih a nih tawh thu a tarlang. India leh US insumdawn tawnna turah hian India-in a ram mipuite duh dan a dah lal a vangin hun rei tak chhung inbiakna hi tihfel theih a nih loh phah a ni.

EAM chuan UNGA hmanga kal ve Philippines secretary of foreign affairs, Theresa P. Lazaro chu ram pahnih thawh dunna tur atan a hmu nghal bawk. Ram pahnihte inlaichinna leh UN leh Indo-pacific huam chhunga thawh dunna turte an sawi dun. Jaishankar hian UNGA neih kar lakah ram hrang hrang hruaitute a kawm bawk ang.