"Vote rukbo" leh ṭhalai hnathawh tur neih lohna a inzawm: Rahul Gandhi

Congress hruaitu leh Lok Sabha-a Leader of Opposition (LoP) ni bawk, Rahul Gandhi chuan nimin khan BJP-in state hrang hrang inthlannaa vote an tihchingpen chhung chuan eirukna leh hnathawh tur awm lohna hi a awm reng dawn tih a sawi.

Gandhi chuan a X-ah hemi chungchang hi post-in, heng thil dik lo thleng ṭhin vang hian ṭhalai tam tak chuan hna dik lo taka thawh 'job theft' leh vote theft' chu an palzam mai mai thei tawh lo ang, a ti.

Gandhi chuan ram chhunga ṭhalaite harsatna tawh lian ber chu hnathawh tur awm lo a nih thu a tarlang a, hengte hi vote tihchingpenna nen a in kungkaih vek bawk niin a sawi. Mipuiten an aiawh tura an thlan, sorkar chuan thuneihna a chan rualin mipui tana hna leh hamṭhatna pek chu an tihtur hmasa ber a ni tiin, BJP erawh chuan inthlannaah dik taka hnehna an chan loh avangin thuneihna chelh reng chungin vote-te ru in institution-te an thunun ta zawk niin Gandhi chuan a tarlang.

Sorkar thil tihdan fel lo avangin ramchhungah kum 45 hnua hna nei lo awm zat a san ber ṭum a thleng mek a, hna lak dan a mumal lo a, ṭhalai tam tak hmalam hun chu a tikhawlh ta vek a ni, a ti. Hengte vang hian exam paper tam tak a put ru a, hna lak zawng zawngah hlemhletna nen a sawizawm theih tur thil a thlen reng phah a ni, tiin Congress hruaitu chuan a sawi.

Gandhi chuan India rama ṭhalaite dinhmun pawh sawilangin, hnathawh tur awm lohna ringawt do chu awmzia a awm lo tih ṭhalaite chuan an hre tawh a, hna atan chauha bei loin vote tihchingpenna zawk chu do tur a ni tih an hre tawh a ni, a ti. Sawi zawmin ṭhalaite chuan vote rukna a thlen chhung chu eirukna leh hnathawh tur awm lohna chu a awm reng dawn tih an hrethiam tawh niin a tarlang.