Britain PM Starmer-a'n India tlawh dawn

Britain prime minister Keir Starmer chu October 7-9 hian Mumbai-a Global Fintech Fest neih tur hmangin a lo zin dawn. A cham chhung hian prime minister Narendra Modi nen ram pahnih thawh dunna tur hrang hrang an sawi dun ang.

Thla hnih liam ta khan PM Modi chuan U.K.-India free trade agreement ziak turin UK a lo tlawh ve tawh bawk a ni.

India leh UK hian insumdawn tawnna tur chungchangah hma lain zirchianna kalpui mek a ni. Insumdawn tawnna tura inremna ziah hi nakkum 2026 aṭanga hman ṭan tura ruahman a ni a, nikum July khan Technology Security Initiative-a investment tihna tur an puang tawh bawk.

Ram pahnihte hian insumdawn tawnna hi US-in India laka chhiah 50% a lak hnuah nasa takin a ṭhang bawk. UK mai bakah EU chuan India nena thawh dunna tihhmasawn an duh tih an tichiang tawh a; mahse, Russia nen sipai huanga an thawh dunna leh oil an lei ṭhin chu an ngaimawh niin an tarlang thung. Hetih mek laiin UK hian US chu technology leh nuclear agreement-ah inremna an lo siam pui ve tho a ni.

Starmer cham chhung hian technology, defence, leh security bakah summit neihnaah education huanga thawh dunna tur chungchang sawi ho tum a ni bawk. Tun dinhmunah India-ah hian UK university eng emaw zatin campus an hawng tawh a, kumin khan University of Southampton chu hawn leh a ni bawk. Starmer hian Mumbai bakah khawpui dang a tlawh dawn a, mah se tihchian a la ni lo thung.