India leh Morocco in defence-a thawh dunna tur MoU ziak

India leh Morocco chuan Thawhṭanni khan defence huanga thawh dunna turin Rabat-ah Memorandum of Understanding(MoU) chu defence minister Rajnath Singh leh Morocco defence minister Abdeltif Loudiyi te'n an ziak. Defence minister hian Morrocco khawpui, Rabat-a Indian embassy-ah defence wing thar a hawng nghal bawk.

Defence ministry chuan MoU ziah hi chak taka thawh dunna tihzauhna tur leh, defence industry, sipai nunchan zir hona, military training, leh hmasawnna hrang hrang thlen thei tur kawng sial thei tura a ni tih a sawi. Heng bakah defence industry thawh dunna tihzauh an remtih bakah firfiak pawl, tuipui venhimna, cyber defence, ralmuanna thlen, sipai damdawi, leh thiam bikna in thleng tawnte chu minister pahnih chuan an remti tih an tarlang.

Minister Singh chuan Loudiyi chu India tlawh turin a sawm ve nghal bawk. Tun ṭum meeting hian India leh Morocco inkar, hun rei tak aṭanga ṭhianṭha an lo nih tawhna a tihngheh zual bakah, an thawh dunna ṭhang mekah thil chhinchhiah tlak tak a siam niin Singh chuan a sawi.