January 16 aṭangin Covid vaccine pe chhuak dawn
Prime minister Narendra Modi hoa high-level meeting neihah ram chhunga Covid hri leng mek dinhmun leh vaccine pekchhuah dan turte an ngaihtuah hnuah, January 16 aṭangin coronavirus vaccine chu pekchhuah ṭan a ni dawn tih tarlan a ni.
PM chuan vaccine pek chhuah ṭan a ni thei tur chu Covid-19 hripui leng mek do letna kawnga thil hriatreng tlak tur a ni tih a sawi. Vaccine pek chhuah turah healthcare worker vaibelchhe khat vel leh frontline staff vaibelchhe hnih vel chu dah pawimawh hmasak an ni dawn a, heng mite hi a thlawn vekin vaccine hi pek a ni dawn tih union health minister Dr Harsh Vardhan chuan a hmain a lo sawi tawh a ni. Hemi dawtah hian kum 50 chung lamte vaccine hi pek hmasak an ni ve leh ang a, a dawtah kum 50 hnuai lam zinga natna benvawn neite pek an ni leh ang. Mahse heng mite hian medical certificate an neih a ngai thung ang. Vaccine pek chhuah thawh khatnaah hian mi vaibelchhe 30 velin an dawng dawn a ni. Sorkar laipuiin application a siam, CoWIN-ah beneficiary maktaduai 7.9 chuang chu ziah luh an ni tawh.