State 7-ah bird flu leng tawh

State pasarihah arva pul hri, bird flu chu a leng mek tih nemngheh a ni tawh a, sorar laipui chuan hri len dan enfiah leh a darh zel tur venna kawngah tualchhung thuneitute theihtawpin a thawhpui mek. 

Uttar Pradesh bakah Kerala, Rajasthan, Madhya Pradesh, Himachal Pradesh, Haryana leh Gujarat-ahte brid flu hi a leng tih nemngheh a ni tawh a ni. Delhi chuan khawpui chhunga poultry market lian ber, Ghazipur ami chu ni 10 chhung atana khar a, ar leh sava lam chi lakluh a khap bawk. Delhi district tinah bird flu laka invenna atan rapid response team siam a ni tawh a, veterinary officer-te chuan ar/sava zawrhna hmunte leh ramsa awmna hmunte an enfiah mek a ni. 

Punjab pawhin Jan­uary 15 thleng atan ar/sava lakluh bakah, arsa lakluh a khap. Madhya Pradesh-a district 13-ah bird flu hi hmuh a ni tawh a, district 27-ah choak leh sava chi dang 1,100 vel thia hmuh an ni. Agar Malwa district-a poultry market-a sample endikah virus hi hmuh a nih avangin he bazar hi kar khat chhung atan khar a ni. 

Chhattisgarh-a Balod distric-ah January 8 leh 9 khan sava eng emaw zat an thi a, state sorkar chuan he thil thleng enfiah tur hian rapid response team a din nghal a, sample te pawh laboratory-ah an thawn nghal. Maharashtra-a Par­bhani district-a poultry ram-a ar 900 an thi a, chhui chian mek a ni. Mumbai, Thane, Dhapoli leh Beed district-a choak thi sample-te chu National Institute of High Security Animal Diseases-ah enfiah tura thawn an ni bawk. 

Kerala-a bird flu lenna district pahnihah chuan ar leh sava suat hna thawh zawh a ni tawh. Hri darh zel tur venna atan state hmalakna enpui turin central team pawh an thleng tawh a ni.