Loneituten Haryana CM programme neihna tur hmun suasam

Haryana-a Karnal district-ah nimin khan loneitute pungkhawmin, Kaimla khuaa chief minister Manohar Lal Khattar-a'n 'kisan mahapanchayat' pro­gramme a hmanna tur hmun luhchilhin, hmanruate an suasam. 

CM hian ram chhung hmun hrang hranga loneituten an dodal mek, sorkar laipui farm law siam thar pathum ṭhatna leh, loneituten an hlawkpui dan turte sawi a tum a ni. Hei hi duh loin, programme ṭan hmain loneitute hian Kaimla khaw panin kawng an zawh a, police-te chuan pungkhawmte hnawhdarh  nan hian water cannon leh teargas te an hmang a ni.

CM programme neih tur atan hian venhim hna thawk turin police 1,500 chuang an dah a ni a, checkpoint pawh pasarih siam a ni.  Mahse hetichung hian  loneitute hian Kaimla khuaa CM hun hmanna tur hi an pan lui a, checkpoint siamte chu paltlangin hun hmanna tura stage an siam chu an tichhia a, chair, dawhkan leh pangpar khawite pawh an paih dah a ni. Helicopter hmanga CM rawn ṭum­na tur, helipad lo siam lailawk pawh loneitute hian a luah zui a ni. 

Buaina chhuak vangin CM programme hman tur hi ṭhulh zui nghal a ni bawk.

Kar liam ta Inrin­ni khan lonetiute hian Barwala-a BJP programme neih tur pawh an lo tibuai tawh a, sorkar laipuiin farm law pathum a siam tharte chu a sut leh hma chuan an state chhungah BJP leh JPP hruaituten vantlang inkhawm an buatsaih an remti dawn lo tih an sawi.