Jaishankar-a'n ram hrang hrang foreign minister kawm

External affairs minister S Jaishankar chuan New York-a 80th session United Nations General Assembly neih kar lakah ram hrang hrang foreign minister-te a kawm.

Jaishankar hian Mexico, Cyprus leh Pacific thliarkar ram foreign minister-te kawmin, thawh ho dan turte a sawipui a ni. Hei hi India-in khawvel ram hrang hrang a thawhpuina tichak tura a inpekna tihchianna a nih thu a sawi.

Jaishankar chuan Nilaini khan Mexico secretary of foreign affairs Juan Ramon de la Fuente nen an inkawm thu social media-ah a tarlang a, Juan Ramon nen hian thawh dunna tur ruangam thar siam chungchang an sawi dun a ni. Cyprus foreign minister Constantinos Kombos nen ram pahnih thawh dunna kalpui mek chu an thlirlet bawk a, awmze nei leh daih rei zawka thawh dunna neih zel dan pawh an sawi bawk.

External affairs minister hian Pacific thliarkar ram hruaitu hrang hrangte chu Nilaini vek khan a kawm a, a kawm zingah hian Marshall Island, Tuvalu, leh Palau foreign minister-te an tel. Pacific ramte nena thawh dunna kawnga inpekna thuk zawk neih zel a, thawh hona ṭha siam chhunzawm chu India thil tum ber a nih thu a sawi lang.

80th session UN General Assembly (UNGA 80) hi September 9 khan neih ṭan niin, Thawhlehni khan high-level General Debate neih ṭan a ni. Jaishankar hian Forum for India-Pacific Islands Cooperation (FIPIC) Foreign Ministers’ Meeting chu a kaihruai nghal bawk.