India leh Russia inṭhian ṭhatna a nghet zual zel : PM Modi

Prime minister Narendra Modi chuan nimina Greater Noida-a 3rd edition Uttar Pradesh International Trade Show 2025-a thu a sawiah, India leh Russia thawh dunna chu hun rei tak chhung awh tawh a nih thu sawiin, an inṭhianṭhatna chu a nghet zual zel a ni, a ti. India leh Russia chu ralthuam Ak-203 leh BrahMos missiles siam chhuah kawngah an thawh dun thu a tarlang bawk.

PM Modi chuan,"Tunah he trade show a ram thawhpui chu Russia a ni a, chumi awmzia chu hun rei tak aṭanga thawh dun tawhna tichiangtu a ni," a ti. Sawi zawmin,"India chuan sipai thahrui tihchakna turin ram chhunga siam hman a uar ṭan a, hei hi ram dang aṭanga chawk luh tihtlemna tur kawng a ni," a ti bawk. Modi chuan khawvel dinhmun a chet vel reng lai karah pawh India ṭhanna chu a ngai rengin a kal thu a sawi lang.

Defence huanga hmasawnna tur chu Uttar Pradesh-ah a in ṭan mek thu leh, ralthuam tam tak siam kawngah pawh hmahruaitu a nih chhoh a beisei thu Modi chuan a sawi lang bawk. "Mahni kea din theihna turin ram chhungah ngei a chinfelna ngaihtuah chu thil ṭul tak a ni a, product hrang hrang ram chhung ngeia siam theih apiang siam zel chu 'Atmanirbhar Bharat' thlen theitu tur a ni," a ti.