Ram chhung thil siamchhuah lei uar a ṭul : PM Modi

Prime minister Narendra Modi chuan nimin Pathianni khan thla tina radio kaltlanga thu sawina hun a hman ṭhin, 'Mann ki Baat' hun hmang lehin, ram mipuite chu mahni intodelhna a thlen thuai theihna turin ram chhunga thil siam leh thar chhuahte lei uar turin a chah. PM Modi chuan kutpui hun rawn thleng chho turah pawh ram chhung thil ngei lei tam chu ram economy tihmasawntu tur leh, kutkawih eizawnna tihhmasawnna kawng pawimawh a nih thu a sawi.

'Mann ki Baat' kaltlang hian PM Modi chuan ram tana thawk ṭhate chungah lawmthu sawiin, Lt. Commander K. Dilna leh Lt. Commander Roopa Alagirisamy-ten double-handed sailing vessel lawng hmanga khawvel an fang chhuak thei chu a fak bawk. Anni bakah hian ram tana thawh hlawk, tun hnaia thi - Assamese singers Bhupen Hazarika leh Zubeen Garg-te bakah Karnataka lehkha ziak mi SL Bhyrappa te hriatrengna hun a hmang bawk.

PM Modi chuan Rashtriya Swayamsevak Sangh (RSS) kum 100 tlin lawmna pualin postage stamp leh pawisa thir siam a nih tur thu a sawi a, PM vek hian heng thil pahnihte hi October 2 hian a tlangzarh ang. RSS kum 100 tlinna tur Vijayadashami chu India tana hun pawimawh tak a nih thu leh, RSS din a nih hma khan India chu sal tanna kawlah kum 100 chuang a tang ṭhin niin a sawi.