Chhattisgarh-ah Maoist mi lu man nei pathum kap hlum

Chhattisgarh-a Kanker district huamchhungah nimin khan helpawl, Maoist mi leh sa pathum, lu man neite chu kahhlum an nih thu senior police officer chuan a tarlang. Maoist mi pathumte lu man belhkhawm hi cheng nuai 14 a tling.

Helpawl leh police-te hi Chhindkhadak thingtlang khaw bula ram ngawah nimin zing khan an inkap ṭan niin Kanker Superintendent of Police Indira Kalyan Elesela chuan a sawi. Inkahnaah hian Kanker leh Gariaband-a State police leh Border Security Force (BSF) te'n beihpui thlak hi an pui bawk. Maoist mi thah pathumte hi tute nge an nih finfiah tawh niin an ruang bakah ralthuam an hman pawh man a ni bawk.

Chhattisgarh-a tun hnaia beihpui thlaknaah hian Maoist mi leh sa 252 kah hlum an ni tawh a, heng zinga mi 223-te hi Bastar division district pasarih huam chhunga thah vek niin, midang 23 hi Gariaband, Raipur division huam chhungah a ni thung. Kumina thah tawh zingah Communist Party of India (Maoists) Central committee member Katta Ramachandra Reddy leh Kadari Satyanarayana Reddy-te pawh an tel.