Arvind Kejriwal CM thutiam a tiam huna telpui turin PM Modi a sawm

Aam Aadmi Party (AAP) chief Arvind Kejriwal chuan chief minister thutiam a tiam thar leh huna telpui turin prime minister Narendra Modi a sawm.

Delhi Assembly inthlan Inrinni liam taa neih, Thawhlehnia result puan takah khan AAP hi hneh takin an chak a, seat 70 awmna assembly seat-ah an khingpui ber Bharatiya Janata Party (BJP) chuan seat pariat chiah an lak laiin seat 62 zet an la. Hetihlai hian Congress chuan seat pakhatmah an la lo thung.

Narendra Modi hian twitter kaltlangin Kejriwal a lawmpuina thu hi a hlan nghal a, Delhi mipuite duhna tipuitling turin duhsakna a hlan nghal bawk. Kejriwal pawh hian chhanglet nghal vatin lawmthu a hrilh bakah India ram khawpui ber chu 'world class' khawpuia siam a nihna turin sorkar laipui nena thawhdun hlan a nghahhleh tawh thu a tarlang ve nghal bawk.

BJP hian Kejriwal leh a party paih thla tur hian hma an la nasa hle a, an party hotu Amit Shah hoin rally-te an nei hial a, hetichung hian an chak zo ta chuang lo. Kejriwal hi 'firfiak' tite pawhin an sawi hial.

AAP leader Gopal Rai chuan CM thutiam tiam hunah hian state dang CM emaw politics hruaitu emaw sawm anni dawn lo tih lo sawi tawh mah se Kejriwal ber hian Prime Minister hi a sawm leh ta thung a ni.

Arvind Kejriwal hian a ṭum thumna turin Pathianni hian chief minister thutiam a tiam leh dawn a, Ramlila Mai­dan-ah neih a ni ang.