Ladakh-ah curfew la puan chhunzawm

Ladakh-a Leh Apex Body (LAB)-in state nihna leh sixth schedule-a hlankai phutin nawrh an huaihawtnaa buaina chhuak vangin kar liam ta Nilaini aṭanga curfew puan chu nimin thleng khan puan chhunzawm zel a la ni. Leh khawpui huam chhungah internet service tihtawp chhunzawm a la ni bawk.

Official lam chuan curfew puan chhunzawm hi Lt Governor Kevinder Gupta-a'n venhimna dinhmun ennawn tura high-level meeting a koh vang a nih thu an tarlang. Curfew puanna huam chhungah hian boruak a ralmuang tawh hle a; mahse, curfew puan leh internet tihtawp bakah mi panga aia tam punkhawm pawh khapna thupek chu hman zui a la ni thung. Kar liam taa buaina chhuak vang hian mi 150 chuang an hliam a, an zingah police mi 80 an tel. Nawrh huaihawt zinga mi 60 chuang hren niin councillor pahnih an tel bawk a ni.

Congress hruaitu leh Lok Sabha-a Leader of opposition, Rahul Gandhi chuan Ladakh a thil thleng vangin sorkar laipui a dem thu sawiin, nawrh huaihawttute'n an thil ngiat chu tihhlawhtlin sak thuai tura a duh thu leh National Security Act (NSA) hmanga climate activist Sonam Wangchuk man a ni chu pawi a tih thu X-ah a tarlang. Rahul chuan,"Ladakh mipui nunphung leh ziarangte chu BJP leh RSS chuan an beihsaka, a khaipa ber Wangchuk lunginah an khungsak bawk. Inthahna, tharum thawhna leh in vaunate chu tihtawp ni rawh se" a ti.

J&K chief minister Omar Abdulah pawhin sorkar laipui chu J&K leh Ladakh phatsantuah leh an thutiamte tihlawhtling thei loah a puh a, an thil tiam state-a hlan kai lehna tihkhawtlaina chuan an rinna nasa takin a tihchhiat thu a sawi. Kashmir-in harsatna a tawhte sawiin state nihna pek let chuan ram leilung chauh ni loin "Kashmiri" te thinlungah neitu nihna a pe let dawn a ni, a ti bawk.