KDA-in sorkar laipui nena inbiakna neih duh lo

Ladakh Union Territory-a Kargil Democratic Alliance (KDA) chuan Leh-a buaina chhuah hnua activist mante chhuah an nih phawt loh chuan sorkar laipui nena inbiak an duh loh thu nimin khan an puang. Activist hrang hrang man zingah hian Sonam Wanchuk pawh a tel.

KDA co-chairperson Asgar Ali Karbalai chuan mante chhuah an nih hma chu inbiakna neih an duh loh thu hi media kaltlangin a tarlang a, " Activist man Sonam Wangchuk leh mi dang chu chhuah an nih hma leh September 24-a buaina chhuak chungchang, dan anga chhui chianna kalpui a nih hma chuan sorkar laipui nen inbiakna hrim hrim neih kan tum lo," a ti. Karbali chuan Ladakh mi lungawi lohna lantirte 'anti-national' anga an sawi chungchangah sorkar a dem thu sawiin, hun rei tak chhung ram tana an lo thawh ve tawhte hmuhsitna a ni, a ti bawk.

Apex Body, Leh (ABL) hruaitu Thupstan Chhewang leh Chering Dorjay-te'n Thawhṭannia activist mante chhuah hma loha inbiakna neih an tum loh thu an sawi hnuah KDA hian an thlawpna lantirin an rawn sawi ve leh a ni. ABL hma lak dan chu thiltih awm tak a nih thu an tarlang bawk. September 24 a buaina chhuakah khan mi pali an thi a, mi dang eng emaw zat hliamin mi 50 bawr man an ni tawh a ni.

Ladakh-ah boruak a muanawm chho tawh a, curfew puan pawh nimin khan darkar li chhung tihtawp lailawk a ni. Curfew thlahdul chhung hian nitin mamawh bakah dawr hrang hrangte pawh hawn an ni. Mobile internet tihtawp a la ni a, sikul leh zirna-in sang zawkte erawh khar chhunzawm a ni bawk.