Modi-a'n Trump-a ruahmanna siam thlawp

Prime minister Narendra Modi chuan nimin khan US president Donald Trump-a'n Gaza Strip-a inkahhai puanna tura point hrang hrang 20 a ruahman chu ṭha a tih thu X-ah a tarlang. Gaza-a Israel leh Hamas firfiak pawl indona tihtawpna tura inkahhai puanna tur ruahmanna a siam hi Trump hian Thawhṭanni khan a puang a ni.

PM Modi chuan," President Trump-a'n Gaza buaina tihtawp a nih theihna tura inkahhai puan kalpui dan tur a puan chu ṭha ka ti a, hun rei tak buaina tihziawmna tur a ni. Remna leh muanna daih rei zawk thlen tur leh, Israel leh Palestine mipuite inkara venhimna leh hmasawnna thlen tur a nih bakah, West Asia huamchhung tan pawha ṭangkai tur a ni," a ti. President Trump-a hmalakna hi lungrual taka thlawp a nih a, buaina titawpa ralmuanna a thlen ngei a beisei tih a sawi bawk.

Midle East ram Saudi Arabia, Jordan, United Arab Emirates, Qatar leh Egypt foreign minister-te pawhin inkahhai puanna tur chu an thlawp thu Thawhṭanni khan an tarlang tawh bawk. Inkahhai puanna tur ruahman chu Paletinian sorkar pawhin an pawm tawh bakah US ngen anga insiam ṭhatna neih chu an tiam ve bawk a ni. Middle East ram bakah hian Europe ram hruaitu hrang hrangte chuan ṭha an tih thu leh an thlawp thu an tarlang tawh a ni.