Ladakh-a nawrh huaihawtnaa pawikhawihna thleng chhui dawn

Ladakh-a nawrh huaihawtnaa pawikhawihna leh thihna thleng chungchang chu chhui chian a ni dawn tih Ladakh thuneitute chuan nimin khan an tarlang. Ladakh-a Leh khawpuiah September 24 khan BJP office kawtah nawrh huaihawt a nih hnuah buaina a chhuak zui a, mi pali an thi a ni.

Leh Apex Body (LAB) leh Kargil Democratic Alliance (KDA) te'n sorkar laipuiin state nihna pek tur a tihkhawtlai leh, inbiakna awmze nei a awm theih loh vangin ni 35 chhung chaw nghei a nawrh an huaihawt laiin buaina hi a chhuak a, chaw nghei hi an titawp zui bawk. Nawrh huaihawt zinga tam zawk hi ṭhalai niin, Ladakh Autonomous Hill Development Council (LAHDC) hmun an suasam bakah BJP office leh motor-te an hal bawk.

Nawrh huaihawtnaa buaina chhuak leh thihna thleng chungchang chhui chiang turin Ladakh Lt Governor Kavinder Gupta chuan thupek a tichhuak tawh a ni. Chhui chian hna IAS officer Mukul Beniwal, Nubra sub-divisional magistrate in a kaihruai ang.

Lt Governor chuan buaina chhuah ni khan venhimna khauh zawka kenkawh a nih theihna turin curfew a puang zui a, Nilaini khan Union Territory huamchhunga mipuite himna leh, dan leh thupek dinhmun a tha tawk em tih enfiahna nei turin high-level meeting a ko tawh bawk.

Leh khuaa buaina chhuak vang hian environmental activist Sonam Wangchuk leh mi dang eng emaw zat chu National Security Act(NAS) hnuaiah man an ni a, LAB leh KDA-te hian buaina chhuak vanga hrente chhuah leh Wangchuk-a man a nihna chu hnuhdawk turin an ngen mek bawk. Wangchuk-a nupui Gitanjali J Angmo pawhin a pasal chhuah a nih theihna atan president Droupadi Murmu, prime minister Narendra Modi, leh home minister Amit Shah hnenah ngenna a thlen tawh a ni.