Cabinet-in pulses-a ram intodelhna thlen tur Rs vbc 11,440 pawm

Union Cabinet ṭhukhawm chuan kum ruk chhung awh tur central scheme, pulses thar chhuahna kawnga India a intodelhna thlen thei tur "Mission for Aatmanirbharta in Pulses" an pawm. Hemi hlawhtlinna tur hian sum Rs vbc 11,440 ruahman a ni bawk.

"Mission for Aatmanirbharta in Pulses" hi kum 2025-26 aṭanga 2030-31 chhung awh tura tih a ni. Mission kaltlang hian 'tur', 'urad' leh 'masur' thar chhuahte tihpun tum a ni a, sorkar agency National Agricultural Cooperative Marketing Federation of India (Nafed) leh National Cooperative Consumers' Federation of India Ltd (NCCF) te chuan loneitu inziaklutte hnen aṭangin an lei sak thei dawn a ni.

Mission hnuaiah hian sorkar chuan pulses thar chhuah chu ton nuai 242 aṭangin kum 2030-31 nuai 350-ah kai tir a tum a ni. Hengte vang hian pulses chinna hmun chu hectare nuai 242 aṭangin hectare nuai 310-ah tihzauh tum a ni a, hemi aṭang hian pulses thar chhuah chu hectare khata kg 881 aṭangin kg 1,130-ah a pun theih beise a ni bawk.

Sorkar laipui hmathlir a hlawhtlin theihna tur hian loneitute hnenah pulses chi nuai 88 chu pek chhuah tum a ni a, tur', 'urad' leh 'masur' te chu Pradhan Mantri Annadata Aay Sanrakshan Abhiyan (PM-AASHA) hnuaia price support scheme(PSS)-ah dah tum a ni bawk. Hralhna tur chungchangah mission chuan khawvel puma pulses man a thlithlai reng dawn a, Nafed leh NCCF in a hralhna zawng zawng an buaipui nghal dawn a ni.