CRPF-in Pulwama beihnaa thite hriatrengna hmang

Central Reserve Police Force (CRPF)-te chuan ni­kum February 14-a Jam­mu and Kashmir-a Pul­wama district-a Jaish-e-Mohammed (JeM) firfiak pakhatin thihchilh bomb hmanga CRPF convoy a beih avanga sipai 40-te thihna champha vawikhatna chu nimin khan an hmang. 

"Vawiin hian kan ram tana nun hlantu kan sipai huaisente hi kan hre reng a, anmahni bakah hian an chhungte pawh kan theihngilh lo a ni," tiin CRPF chuan an twitter-ah an tarlang. PM Modi pawhin CRPF thi ta te pual hian thuchah neiin, ram leh hnam tana an inpekna leh India chhanhim tura an nun an hlanna chu a fak thu leh, India chuan engtikah mah a theihnghilh tawh dawn loh thu a twitter kaltlangin a sawi ve bawk. 

Pulwama-a thil thleng chungchangah hian Pakistan firfiak pawl, Jaish-e-Mo­hammed (JeM) chuan CRPF convoy beitu an nih thu hi a hnuah an sawi chhuak a, sipaite chuanna motor sua a bomb phurh kg 300 dawna rit tipuaktu chu kum 22 mi, Adil Ahmad Dar a nih thu leh a thlalak leh video clip-te pawh JeM chuan a tichhuak a ni.