SC-in farm law thar pathum kalpui rih lo turin hriattir

Supreme Court chuan nimin khan sorkar laipui hnenah ram chhunga loneitu pawl hrang hrangin an dodal mek, farm law thar pathum a siam chu kalpui rih lo turin a ti. Hei hi sorkar laipuiin a zawm lo a nih chuan, court chuan a dang rih mai dawn niin a sawi. 

Nimin khan Supreme Court hian farm law chungchanga petition lutte a ngaihtuah a, he dan duh lohna lantira Delhi khawpui bula loneitute nawrh huaihawt mekah boruak a ṭha lo chho zel tih sawiin sorkar laipui hnenah, "Heng dante hi i titawp rih dawn nge, keimahniin kan kan lo tihtawp sak dawn che u?" tiin a hrilh. 

Chief justice of India SA Bobde chuan, "Thil ṭha lo zawk a thleng chho a nih chuan kan vaiin mawhphurtu kan ni ang. Hliam tuar an awm kan duh lo a, kan kuta thisen a kai kan duh lo a ni," tiin na takin a ṭawngchhuak. 

Loneituten nen inbiakna an neih  mek thu sawiin, sorkar laipui aiawh chuan hun la pe turin a ngen a, mahse justice Bobde chuan, "He buaina chinfel hna hi awmze nei takin in kalpui niin kan hre lo. Thutlukna hi kan siam mai dawn a ni. Thisen inchhuahna thleng se tunge mawh phur dawn?" tiin a chhang let. 

Farm law pathum siam tharte chu a taka hman ni rih loin titawp lailawk pawh ni se loneitute chuan nawrh an la huaihawt chhunzawm reng dawn niin Court chuan a sawi bawk a, hemi rual hian Delhi border-ah nawrh chu huaihawt chhunzawm zel an tum nge, hmun dangah insawn an tum tih tichiang turin loneitute aiawh lamte a hrilh bawk. 

A hmaa hearing neihah pawh Supreme Court chuan loneitute leh sorkar laipui inkarah hmasawnna a awm lo niin a lo sawi tawh bawk.  Chief Justice chuan sorkar laipui hnenah a hmaa zawhna a zawh chungchangah pawh chhanna a awm loh thu sawiin, "Thil awmdan hi a chhe chho zel a ni. Mahni intihhlum phah hialte pawh an awm tawh. Engvangin nge tun ang khawvawt hnuaia nawrh huaihawtnaah kum upa leh hmeichhiate an tel a ngaih tak hial ni?" tiin a zawt. 

Hetih lai hian sorkar laipui aiawhtu, attorney general KK Vengugopal chuan farm law chungchanga buaina chinfel dan ngaihtuah turin committee din zawk a, heng dan tharte hi 'stay' lo turin a ti ve thung. Loneitu nawrh huaihawt mekte chu state pahnih/pathum vel ami chauh a ni tiin, khawthlang lam leh chhim lama loneitute chuan an zawm ve lo niin a sawi. 

Sorkar laipui hian farm law chung­changah inremna siampui tumin loneitute hi ṭum riat inbiakna a neihpui tawh a, mahse tun thlengin inremna tluantling an la siam thei lo. Loneitute chuan heng dan siam thar pathumte hi sut leh vek turin sorkar an phut a, mahse sorkar chuan sut a tum lo tih a sawi thung a,  loneitu lam duh dana dan siamṭhat erawh a inhuam tih a sawi a ni. Sorkar leh loneitu pawl aiawhte hi tunkar Zirtawpni hian an inbe leh ang. 

Sorkar laipuiin nikum September thlaa a siam, farm law thar pathum duh lohna lantirin loneitute hian Delhi border an pan khawm a, nikum November thla tawp lam aṭang khan dan thar duh lohna hi an lantir a ni.