Darjeeling-ah leimin vangin mi 17 an thi

West Bengal-a Darjeeling district-ah ruahsur vangin Inrinni zan khan leimin nasa tak a thleng a, mi 17 an thi a, chin hriat lohin eng emaw zat an awm.

Leimin hian chenna in eng emaw zat hnawlin kawngpui pawimawhte a hnawhping a, lei a hnawl chhiat bawk avangin harsatna tawkte chhanchhuah leh chhawmdawl hna thawh pawh duh angin a chak thei lo tih thuneituten an sawi. Hei bakah ruah a sur chhunzawm reng bawk avangin hnathawh a tibahlah bawk a ni.

West Bengal chief minister Mamata Banerjee chuan chhiatna thlenga thi chhungte a tuarpui thu sawiin, chhiatna thlenna hmun hi vawiinah chief secretary nen an tlawh dawn tih a sawi. Thi chhungte hnena zangnadawmna pek a nih tur thu a puang nghal bawk a, mahse pek tur zat erawh a sawilang lo. CM hian harsatna tawkte tana biakpawhna tur, helpline number chu a X-ah a tarlang bawk.

Prime minister Narendra Modi pawhin West Bengal-a chhiatna thleng chu pawi a tih thu sawiin, thi chhungte a tawrhpui thu leh, hliam te pawh an dam thuai a duhsak thu a sawi. Harsatna tawkte ṭanpui leh chhawmdawl kawngah sorkar laipui chuan theihtawpa puih a inhuam thu a sawi a ni.