BJP vangin ei leh in lamah harsatna a thleng thei : Mamata Banerjee

West Bengal chief minister Mamata Banerjee chuan farm law thar sut tura nawrh huaihawt mek, loneitute inremna siampui tum loa BJP sorkar a chet zel avangin India ram chuan ei leh in lamah harsatna nasa tak a tawk thei a ni, a ti. 

"Ram chuan food crisis a hma­chhawn mek a ni. BJP hian farm law chungchangah a ngaihdan a thlak duh lo a nih chuan kan ramah ei leh in lam indaih lohna nasa tak a thleng dawn a ni. Loneitute chu kan ram innghah chhan pawimawh tak an ni a, an duh loh leh an tana ṭha lo tur zawngin eng thil mah kan ti tur a ni lo," tiin Banerjee chuan nimina Nadia district-a rally neihnaah a sawi. 

Trinamool Congress (TMC) hotu hian farm law pathumte chu sut thuai turin sorkar laipui a phut nghal bawk. BJP chu na taka bei zuiin, India rama party bawlhhlawh ber niin a puh. "Dustbin party an ni. Party danga hruaitu eiru leh tenawm tak takte chu lalutin chanvo pawimawh te an pe ṭhin a ni," tiin, tun hnaia TMC hrauitu ṭhenkhat, BJP zawmtute chu an sum eirukte thup leh vawnhimna atana lut niin a puh. 

"BJP chu washing machine ang mai an ni a, party danga hruaitu eiru nasa tak takten BJP an zawm chuan mithianghlim ang maiin an lo sawi tawh ṭhin a ni," a ti. BJP thlawptute US President Donald Trump thlawptu, tun hnaia Washington Capitol Building beitute nena tehkhinin, inthlan an chak lo nih chuan BJP mi leh sate pawh hetiang chiah hian an la che ve mai ang, a ti.