Thingpui no khat aiin mobile data tlawm zawk : PM Modi

Prime minister Narendra Modi chuan nimin khan Yashobhoomi Convention Centre, New Delhi-ah India Moblie Congress (IMC) 2025 vawi kuana a hawng a, ram chhungah mobile data chu thingpui no khat aia a tlawm zawk thu a sawi. India chu khawvel ram zingah hmangtu aṭanga data hman ral tamna a nih thu a sawi lang bawk.

Minister of communication Jyotiraditya Scindia chuan India chu kum 11 kalta chhung khan mobile data man tlakhniam nasatna ber a nih thu a sawi a, 98% laia a tlakhniam thu leh kum 2014-a Rs 287 per GB ni ṭhin chu Rs 9.11 a nih thu a sawi. India chu khawvela mobile 20% lai awm leh a hmangtu tluklehdingawn 1.2 zet awmna a nih thu a sawi.

India-in mobile a siamchhuah chu a let 28 in a pung a, a thawn chhuah zat pawh a let 127 in a pung bawk tih Scindia chuan a sawi a, kum 10 liam ta chhung khan mobile phone siam chhuahna-te chuan hna maktaduai eng emaw zat an siam bawk niin a tarlang. India in electronic thil a siam chhuah chu kum 2014-aiin a let rukin a pung tih a sawi bawk.

PM Modi chuan khawvel pumah semi conductor mamawhna a sang mek a, ram chhungah pawh semiconductor siam chhuahna hmun 10-ah siam tum a nih thu sawiin, hei vang hian company-te chu mobile hmanrua leh chipset siam kawngah hma la turin a ngen. India chu khawvela 5G market lian ber dawttu a nih thu leh, district tinah hman theih a nih tawh thute PM chuan a sawi lang a ni.