Bank dawrtute lakah ink hmang lo turin ngen

Sorkar laipuiin bank dawrtute chhinchhiahna atana inedible ink a hman chu hmang chhunzawm tawh lo turin Election Commission chuan a ngen.

Bank-a pawisa hlui thleng duh leh, pawisa lak chhuah duh intlar an tam avangin rualkhai taka kalpui a nih theih nan sorkar laipui chuan bank dawrtute chu inthlan laia vote thlakte chhinchhiahna atan ink an hman ṭhin hmangin a chhinchhiah tir a, hei hi mi pakhatin vawi tam tak intlara sum a lakchhuah tur venna atana tih a ni.

Mahse Election Commission chuan Finance Ministry hnenah ngenna thlenin, bank dawrtute lakah ink chu hman anih chuan, inthlan neihna tur state ṭhenkhatah harsatna a thlen thei dawn niin a sawi a, hmang chhunzawm tawh lo turin a ngen. Uttar Pradesh leh Punjab state chu nakkum kumtirah an inthlang dawn a, hetihlai hian vawiin-ah Madhya Pradesh, West Bengal, Tripura leh Arunachal Pradesh-ahte by-election neih a ni dawn bawk.

Nilaini aṭang khan ramchhunga bank lian ber, State Bank of India hnuaia branch 11 bakah, Bank of India, Canara Bank leh RBI Delhi office-te chuan Rs 500 leh Rs 1,000 note hlui thlengte chhinchhiah nan ink hi an hmang ṭan a ni.

India rama inedibel ink siamtu pawm awmchhun, Karnataka sorkar hnuaia Mysore Paints and Varnish Ltd (MPVL) chuan ink bur nuai 2.9 order an hmu tawh tih an sawi. Ink bur khat hi 5 ml niin, Rs 116 man a ni. Bank hrang hrang aṭangin order hi an hmu a ni.